qareeb maut khari hai zaraa thahar jao
qazaa se aankh lari hai zaraa thahar jao
thaki thaki si fazaayen bujhe bujhe taare
bari udaas ghari hai zaraa thahar jao
nahin ummeed ki ham aaj ki sahar dekhen
ye raat ham pe kari hai zaraa thahar jao
abhi na jao ke taaron kaa dil dharaktaa hai
tamaam raat pari hai zaraa thahar jao
phir is ke baad kabhi ham na tum ko rokenge
labon pe saans ari hai zaraa thahar jao
dam-e-firaaq mein ji bhar ke tum ko dekh to luun
ye faisale kii ghari hai zaraa thahar jao X
521 chars (4 sms)